Matur

All posts in the Matur category

Spænsk Gazpacho-súpa

Published 3 júní, 2013 by fanney

Hérna í Kalvåg er búið að vera ansi hlýtt og sólríkt síðustu vikuna og löngun mín í ískalda og frískandi Gazpacho-súpu aukist með hverjum deginum. Í dag átti ég frí í vinnunni svo það var tilvalið að skella í þessa dásemd. Var líka svo heppin að allir tómatar í Spar voru á 40% afslætti, hentugt!

Þessi súpa er spænsk, ættuð frá Andalúsíuhéraðinu á Spáni og er eflaust jafn misjöfn og heimilin sem útbúa hana. Uppistaðan er þó tómatar og grænmeti og hún er borin fram ísköld, stundum með ísmolum útí. Fyrst þegar ég smakkaði þessa súpu þótti mér hún skrýtin, það var eitthvað spes við það að borða kalda súpu. En síðan þá hef ég borðað hana reglulega og í hvert einasta skipti hugsa ég; ohh, af hverju geri ég þessa súpu ekki oftar? Í flestum upprunalegum uppskriftum er dagsgamalt brauð lagt í bleyti og sett útí súpuna til að þykkja hana, en ég er löngu hætt að gera það. Margir hafa líka stökka brauðteninga með súpunni en ég sleppi þeim og nota gulrót í staðinn. Fyrir vikið er súpan glútenlaus (vei!) og eintóm hollusta og unaður.

Það er hægt að leika sér með grænmetið sem sett er í súpuna, sem og kryddjurtir. Hægt er að nota basilíku, steinselju, timjan, myntu… hvað sem ykkur dettur í hug! Prófið endilega og reynið helst að borða súpuna úr litríkri skál úti á palli, í garðinum eða útá næstu stétt.


photo-15

 

___

Spænsk Gazpacho-súpa

f. 2

 

700 gr vel þroskaðir tómatar (ekki kaupa þessa útlensku sem maður setur sjálfur í poka og eru ljós appelsínugulir. Við viljum nota djúprauða tómata sem hafa djúpt og mikið bragð. Þessi uppskrift er hræódýr svo það er í lagi að gera vel við sig í tómatinnkaupum hér!)

1/2 rauð paprika

1/2 paprika, hvaða litur sem er

1 gúrka

nokkrir vorlaukar

4 msk söxuð steinselja/basilíka…

1/2 rautt chilli

5 msk ólífuolía

2 msk balsamedik (eða annað gott edik sem þið eigið)

1 væn gulrót

2 hvítlauksrif

salt og pipar

__

Byrjið á því að sjóða vatn, skera mjög grunnan kross neðan á alla tómatana og setja þá í skál, hella svo sjóðandi vatninu yfir þá og leyfa að standa í sirka mínútu. Með þessu er auðveldara að flysja tómatana, en við viljum ekki hafa flusið á þeim. Flysjið svo tómatana og skerið til helminga, takið fræin úr og setjið í blandara/matvinnsluvél/skál. Skerið hálfa gúrku í grófa bita og bætið út í, sem og 1/2 rauðri papriku, 2 msk steinselju, 3-4 vorlaukum, chilli, 4 msk ólífuolíu, ediki, hvítlauk og salti og pipar. Maukið þar til mjög vel blandað og smakkið til með salti og pipar (og chilli ef vill). Skutlið inní ísskáp og kælið í amk hálftíma eða fram til næsta dags þess vegna.

Með súpunni er borin fram nokkurs konar salsa. Í hana nota ég iðulega ca 1/2 paprik

 

u í einhverjum lit (eða mörgum litum!), 1 gulrót, 1/2 gúrku, 2-3 vorlauka, 2 msk steinselju, 1 msk olíu og salt og pipar. Skerið allt grænmetið í litla teninga og blandið saman. Smakkið til með olíu, salti og pipar.

Þegar þið berið súpuna fram, setjið þið smávegis af salsa ofan á súpuna (og brauðteninga ef þið viljið), driss af ólífuolíu og ekki væri nú verra að sötra ískalt hvítvín á tyllidegi. Sannarlega sumarfæða!

Auglýsingar

Kínóa- og linsuborgarar

Published 18 febrúar, 2013 by fanney

Kínóa (quinoa) er nú meiri snilldin! Það er svipað og kúskús (couscous) nema kínóa er fræ og glútenlaust, á meðan kúskús er búið til úr hveiti (semolina) og vatni. Kúskús er tæp 4% prótín á meðan kínóa er um 14% prótín. Fyrst þegar ég prófaði að elda kínóa notaði ég það aðallega í salöt og súpur. Í veikindunum síðustu viku hef ég haft ansi drjúgan tíma aflögu til að grúska og fann fullt af girnilegum uppskriftum sem mig langar til að prófa, m.a. með kínóa. Má þar t.d. nefna sushi með kínóa og þessa kínóa- og linsubaunaborgara.

Upprunalegu uppskriftina má finna á þessu skemmtilega bloggi, þar sem er aragrúi girnilegra og hollra uppskrifta. Ég á án efa eftir að prófa fleiri uppskriftir af þessu bloggi! Eins og mín er von og vísa varð ég að sjálfsögðu að breyta uppskriftinni aðeins, mestmegnis sökum þess ég átti ekki allt til sem var í uppskriftinni. Einnig er ég ekki með matvinnsluvélina mína hérna í Noregi, svo ég varð aðeins að spinna mig áfram þar.

Til að gera langa sögu stutta þá eru þessir borgarar þeir bestu sem ég hef smakkað hingað til! Ég prófaði bæði að steikja þá á pönnu og baka í ofni. Báðar útgáfur komu vel út, en ég var hrifnar af steiktu borgurunum. Þeir fengu stökkari húð og voru ekki eins blautir inní. Kannski ég hafi þurft að baka hina aðeins meira til að fá svipaða niðurstöðu?

Þessa hollu borgara má borða eins og hamborgara, þ.e. á brauði með sósu og salati, það er hægt að setja þá í tortillavefju með grænmeti og djúsí sósu, borða með sætkartöflufrönskum og grilluðu grænmeti eða hvernig sem ykkur dettur í hug. Í kvöld borðaði ég þá með salati og dressingu úr sýrðum rjóma. Delíss! Ekki verra að eiga núna dýrindis buff, tilbúin inní frysti 🙂

___

Kínóa- og linsuborgarar

12 litlir borgarar – f. 4 manneskjur

80 gr rautt kínóa (1/2 bolli), hægt að nota hvítt kínóa líka eða blöndu

2 dl vatn

1 egg

2 gulrætur, fínt rifnar

1 lítill laukur, fínt rifinn

3 hvítlauksrif

1 tsk cummin

1 tsk kóríander

ca 1 dl glútenlausir hafrar, brauðmylsna eða önnur sterkja til að binda saman

1 dós niðursoðnar linsur (svartar baunir, nýrnabaunir, grænar linsur.. hvað sem er!)

salt og pipar

___

Byrjið á því að setja vatnið í lítinn pott, salta smá og koma upp suðu. Þegar suðan er komin upp er kínóa hellt útí og því leyft að malla á lágum hita, undir loki, í 12-14 mínútur, eða þar til allur vökvinn hefur skriðið inní kínóað. Á meðan er restinni blandað saman. Ef þið eigið matvinnsluvél þá byrjið þið á því að setja gulræturnar í hana og saxa fínt, blandið svo restinni (þar með talið soðna kínóað) útí vélina og mixið í stuttum lotum þar til þetta er orðið að kássu, en ekki of maukað. Ef þið eigið ekki matvinnsluvél getið þið rifið niður gulræturnar í skál, rifið niður laukinn (eða saxað mjög fínt) og hvítlaukinn og sett restina útí. Ég á töfrasprota svo ég leyfði honum aðeins að taka smá snúning í skálinni, en þó ekki þannig að þetta verði að barnamat! Leyfið blöndunni að hvílast í ca hálftíma, þá ná hafrarnir/brauðmylsnan að draga í sig hluta af vökvanum og það verður auðveldara að meðhöndla blönduna við eldun.

Ef þið eigið ísskeið með sleppara, þá mæli ég eindregið með því að þið notið hana. Þannig verður buffgerðin leikur einn! Ef þið eigið enga slíka, þá er bara að nota tvær stórar skeiðar – eða venjulegar skeiðar – bara eftir því hvað þið viljið hafa buffin stór. Ég notaði stærri ísskeiðina mína og fékk út 12 buff.

Ef þið viljið baka buffin í ofni, þá notið þið bökunarpappír og hafið ofninn stilltan á 175°C. Bakið í 15-20 mín og snúið buffunum eftir 8-10 mínútur. Ef þið viljið steikja, steikið í smá olíu á miðlungshita í 6-8 mínútur, eða þar til þið hafið fengið góðan gullin lit.

 

 

Satay kjúklingaréttur með núðlum

Published 22 janúar, 2013 by fanney

Ég elska Satay-núðlurnar á Krua Siam á Akureyri. Það var hún elsku besta Tinna Brá vinkona mín sem kom mér upp á þær. Það er svo margt á matseðlinum hjá Krua Siam alveg fáránlega gott og ekki pakkabragð af matnum heldur alvöru krydd og gúmmilaðiheit. Í dag fékk ég gríðarlega löngun í satay-núðlurnar þeirra, en rétturinn sem ég eldaði vatt aðeins upp á sig þar sem ég er að reyna borða meira grænmeti. Þetta er því nokkurskonar satay-pottréttur með fullt af grænmeti og kjúkling og dass af núðlum 🙂 Ef ykkur líkar satay-sósa, já eða hnetusmjör og/eða hnetusmjör, þá er ég viss um að þessi réttur höfðar til ykkar!

___

Satay-kjúklingaréttur með núðlum

Fyrir tvo svanga maga

Satay-sósan:

100 gr gróft hnetusmjör

1/2 dl sojasósa (Kikkoman þykir mér best, ekki of sölt, ef þið notið aðra sojasósu, byrjið þá með minna magn og sjáið hversu sölt hún er)

3 msk sæt chillisósa (sweet chilli)

1 tsk malað kóríander

1/2 tsk malað cummin (broddkúmen)

1 dós kókosmjólk

safi úr 1 lime

2 cm bútur engifer, fínt rifinn

2 hvítlauksrif, fínt rifin

__

Öllu blandað saman í pott, suðunni leyft að koma upp og þá er sósan tilbúin. Þessi sósa dugar fyrir fjóra svo ég setti restina í krukku og inní ísskáp. Hægt að geyma í loftþéttu íláti inní ísskáp í marga marga daga!

__

2 kjúklingabringur, skornar í bita

1/2 rauðlaukur, skorinn í strimla

2 gulrætur, skornar í strimla

1 lúka baunaspírur

1/2 – 1 rautt chilli, fínt saxað

1/2 rauð paprika, skorin í strimla

nokkrir baby-maísar, skornir í bita

nokkrar water chestnut – hefði ég átt dósaopnara. Þær verða að bíða þar til ég hef fjárfest í einum slíkum

(eða það grænmeti sem ykkur dettur í hug að nota!)

3 vorlaukar, saxaðir

lúka jarðhnetur („salthnetur“ án salts – helst), saxaðar fínt

eggjanúðlur eða hrísgrjónanúðlur

___

Byrjið á því að steikja kjúklinginn og bætið svo grænmetinu útá ásamt chilli-inu, en geymið hneturnar og vorlaukinn þar til rétturinn er borinn fram. Ef þið eigið litla pönnu getið þið byrjað á að steikja kjúllann og setja til hliðar og taka svo grænmetið. Ekki gleyma að salta og pipra kjúllann og grænmetið. Á meðan eru núðlurnar soðnar í léttsöltu vatni, magn fer eftir hungri. Þegar allt er steikt og tilbúið er slatta sósu skellt út á pönnuna og núðlunum blandað saman við (eða núðlunum blandað saman við í stórri skál, bara hita sósuna aðeins á pönnunni áður). Þegar rétturinn er borinn fram er vorlauk og salthnetum stráð yfir og hver og einn kreystir svo úr lime-bát yfir diskinn sinn, hversu mikið fer eftir smekk. Sjálf vill ég setja nóg af lime-safa!

Verði ykkur að góðu! 🙂

Granóla (múslí?)

Published 17 janúar, 2013 by fanney

Ég ruglast yfirleitt á þessu tvennu; granóla og múslí. Fyrir mér er þetta það sama, fullt af kornum, hnetum og etv. þurrkuðum ávöxtum. Til þess að gleðja þá smámunasömu þá get ég sagt að það er jú vissulega örlítill munur. Í grundvallaratriðum snýst hann um framleiðsluna. Þ.e. granóla er yfirleitt bakað/steikt í hunangi/sykri/sírópi og olíu, en múslí ekki. Hvað sem því líður þá langar mig að deila með ykkur þægilegri uppskrift að heimalöguðu granóla. Einhverjir kunna að gapa og jesússa sig yfir púðursykrinum og hlynsírópinu, sérstaklega nú í janúar, en er ekki betra að borða heimalagað granóla með smá sykri í staðinn fyrir keypt sull sem maður veit ekkert hvað er í (aukaefni og unnar olíur til dæmis)? Æ, svo má maður nú aðeins lifa, haaa… ;-)

Uppskriftin er miðuð við eins manns heimili myndi ég segja (JEY!) en hana má hæglega tvöfalda, þrefalda eða margfalda að vild. Geymist vel í loftþéttu íláti. Hún er fengin að láni frá Chef John sem ég fylgist vel með á YouTube.


Granóla; eftir ofn

___

Granóla

50 gr púðursykur

3 msk hlynsíróp (um 60 gr)

2 msk olía (um 26 gr)

1/2 tsk salt

140 gr hafrar (ég notaði múslí með þurrkuðum bláberjum, beisikklí hvaða hafrar sem er, blanda af höfrum eða þvíumlíkt, gott í skápatiltektinni!)

100 gr möndlur, grófsaxaðar

30 gr kókosmjöl (ég átti það ekki og notaði saxaðar valhnetur í staðinn)

ég bætti svo við dass af bourbon-vanillukornum, get einnig ímyndað mér að dass af kanil sé unaður

___

Blandið saman púðursykri, sírópi, olíu og salti. Blandið svo höfrunum, hnetum og kókosmjöli saman við – sem og vanillu/kanil eða öðrum kryddum sem ykkur langar að nota. Blandið mjög vel þar til allt er vel húðað í blautefnunum. Ef þið eigið sílíkonmottu, notið hana, ef ekki, notið þá bökunarpappír og spreyið hann með olíu/smjöri. Dreifið vel úr blöndunni og bakið við 140°C í klukkutíma, en hrærið í með gaffli á kortersfresti.

Ef þið viljið setja einhverja þurrkaða ávexti útí (döðlur, apríkósur, rúsínur, epli, mangó…) þá er best að setja þá útí þegar granólað er tilbúið, en ekki baka þá. Mig langar að saxa dökkt súkkulaði og setja útí granólað þegar það er orðið kalt :) En fyrst ætla ég að nota granólað til að búa til parfait fyrir vinkonu mína sem er í „ekkert súkkulaði eða nammi-átaki“ 😉

Verði ykkur að góðu og gangi ykkur vel! :-)

Granóla; fyrir ofn

Tarte aux citron – sítrónubaka

Published 21 desember, 2012 by fanney

Tarte aux citron – sítrónutart – sítrónubaka – sítrónukaka… hvaða nöfnum sem þessi unaður kann að heita, þá er þessi kaka eins sú besta. Ég kynntist henni fyrir alvöru þegar ég heimsótti Nonna vin minn í Cannes í Frakklandi núna í nóvember. Frakkar kunna náttúrulega allra þjóða best að útbúa guðdómlega góða OG fallega eftirrétti. Ég náði að smakka þónokkrar tegundir en sítrónubakan hafði svo sannarlega vinninginn. Já og makkarónurnar, þær voru nú meiri unaðurinn. Sú besta var karamellumakkaróna með dulce de leche og fleur de sel á milli. Ég er viss um að ég væri allnokkrum tonnum þyngri, byggi ég í Frakklandi. Kannski eins gott að heimsóknin varði bara í tíu daga 🙂

En aftur að sítrónubökunni. Hún er alls ekki erfið, en þarfnast örlítillar væntumþykju og ástar – eins og allur matur svosem. Til eru mismunandi útgáfur af bökunni þar sem fyllingin er bæði bökuð og óbökuð, rjómakennd eða súr, en þessi sem ég set upp hér er mín uppáhalds; óbökuð með súru sítrónukremi (sem eitt og sér er algjör snilld ofan á brauð eða hvaðeina). Varðandi formin, þá er upplagt að nota hefðbundið tart-form en venjulegt smelluform dugar líka fínt. Ef slíkt er ekki til á ykkar heimilum má alveg setja tartið í hvaða mót sem, t.d. kringlótt eldfast form, lítil creme bruleé form eða það sem þið finnið í skápunum. En lítum á uppskriftina.

sítrónubaka

___

Tarte aux citron – sítrónubaka

Bökubotn: (fenginn héðan)

175 gr hveiti

100 gr kalt smjör, í bitum

25 gr flórsykur

1 eggjarauða

 

1 – 2 msk ískalt vatn

__

Auðveldasta leiðin við að gera botninn er að setja allt nema eggjarauðu og vatn í matvinnsluvél og púlsa (kveikja og slökkva) þar til blandan líkist brauðmylsnu. Þá er eggjarauðu og 1 msk af vatni blandað saman við. Deigið á að vera nokkuð mylsnulegt, en þó þannig að hægt sé að þrýsta því í mótið. Ef þið eigið ekki matvinnsluvél er hægt að blanda öllu nema rauðu og vatni saman í hrærivél, nota pískinn á hrærivélinni, og blanda þar til mylsnulegt. Setja þá rauðu og vatn. Ef þið eigið ekki heldur hrærivél, þá getið þið gert þetta í höndunum, mulið smjörið saman við hveitið og flórsykurinn með því að nudda saman höndunum. Reynið að vinna fljótt því við viljum ekki að smjörið bráðni fyrren það kemur inní ofn. Þannig fáum við stökkan botn. Að lokum er svo rauðu og vatni blandað saman. Þið getið flatt deigið út og sett það þannig í formið (eftir að hafa kælt deigið í 15-20 mín), en ég er svo bráðlát að ég þrýsti því bara í formið og passa að setja upp hliðarnar líka. Einnig þarf að passa að hornin/kantarnir séu nokkuð sterkir svo þeir haldi. En aðalmálið er að pressa þetta vel í formið og hafa jafnþykkt. Engin þörf á að smyrja formið. Setjið álpappír eða bökunarpappír ofan á botninn og fyllið bökuna með bökunarbaunum, þurrkuðum baunum eða hrísgrjónum. Þetta gerum við svo botninn okkar rísi ekki of mikið, því við viljum hafa nóg pláss fyrir gómsætu fyllinguna. Bakið við 180 °C í hálftíma, eða þar til botninn er bakaður og hefur tekið á sig gullin lit. Gott er að kíkja inní ofninn reglulega og athuga hvort hliðarnar eru að dökkna um of, ef það gerist er hægt að kippa honum út og setja álpappír yfir kantana. Ég baka botninn yfirleitt í 20 mínútur með baununum og tek hann þá út, tek baunirnar úr, set álpappír á hliðarnar og baka í 10 mín eða þar til botninn sjálfur er orðinn bakaður í gegn.

___

 

Fyllingin – sítrónukrem: (fengin héðan)

 

3 egg

1 eggjarauða

150 gr sykur

safi og skrall af 3 sítrónum

50 gr smjör, við stofuhita

__

 

Sé klikkað á linkinn hér að ofan má sjá myndband af því hvernig maður gerir svona sítrónukrem. Það er auðvelt, en maður þarf að sýna ferlinu þolinmæði og ást 🙂

Blandið saman eggjum, eggjarauðu, sykri og sítrónusafa og skralli í gler- eða stálskál og setjið yfir rétt aðeins sjóðandi vatn. Hrærið í stanslaust þar til blandan þykknar, getur tekið 10-15 mínútur. Hérna erum við í rauninni að elda eggin og rauðuna því það eru þau sem þykkja blönduna, svipað ferli og þegar maður gerir karamellubúðing. Passið því að hafa vatnið ekki of heitt (ekki bubblandi sjóðandi, bara svona simmrandi) og hrærið allan tímann (þarf ekkert að vera krafthrærun, bara svona dúbbídú ég er að hræra í skál). Þegar kremið hefur þykknað er það tekið af pottinum og smjörinu blandað útí, við það kemur æðislegur gljái á kremið sem og góður smjörkeimur til að balansera við sýrunni í sítrónunni. Það er svo undir yk

 

kur komið hvort þið viljið sigta blönduna eður ei, þ.e. sigta börkinn frá, en það þykir mér betra. Ég smelli því blöndunni í gegnum sigti og beint útá bökubotninn (sem hefur fengið að kólna). Setjið plastfilmu yfir kremið þannig að filman snerti kremið allstaðar, þannig fáum við ekki leiðinlega ,,filmu“ á kremið, svona eins og þegar sósur kólna.

Þessi baka er stórkostleg svona, borin fram með þeyttum rjóma, ís eða vanillusósu. En ef tilefnið er sérstakt, er algjörlega við hæfi að útbúa ítalskan marengs til að setja ofaná.

__

Ítalskur marengs:

2 dl  vatn

200 gr sykur

 

4 eggjahvítur

1/4 tsk salt

1 tsk sítrónusafi

__

Setjið vatn og sykur í pott og hitið uppí 125°C. Þegar sírópið hefur náð ca 100 gráðum, byrjið þið að þeyta eggjahvíturnar ásamt salti og sítrónusafa. Þeytið þær þar til stífþeyttar, en ekki þurrar. Þegar sírópið er orðið 124°c er það tekið af hitanum (það heldur áfram að hitna) og hellið ofurvarlega í eggjahvíturnar Á MEÐAN ÞÆR ERU ÞE

YTTAR ÁFRAM. Við erum að tala um bara dropa og dropa, eða örmjóa bunu til að byrja með því við viljum ekki enda með hrærð egg, heldur dúnmjúkt krem. Hafið því hrærivélina hratt stillta og hellið öllu sírópinu varlega útí, haldið svo áfram að hræra þar til skálin kólnar og er orðin stofuheit eða svo. Þá getið þið stoppað vélina og verið fullviss um að eggin séu ekki að fara eldast 🙂 Þessum marengsskýjum er svo dúbbað yfir kalda sítrónubökuna og smá flórsykri stráð yfir. Getur staðið í nokkrar klukkustundir en er best samdægurs. Einnig er hægt að nota gasbrennara og brenna toppinn örlítið og fá svona sykurpúðafíling 🙂

___

Ég veit þetta er löng uppskrift, en ef þið hafið lesið í gegnum allt þá sjáið þið að þetta er ekkert mál, tekur bara smá tíma. En afraksturinn er algjörlega þess virði, því lofa ég! Ef þið eruð ekki mikið fyrir súrt, þá er sjálfsagt að blanda saman smá þeyttum rjóma við sítrónukremið og fylla bökuna með því. Ekki síðra!

Gangi ykkur vel og verði ykkur að góðu!!!

 

xxx

Fanney Dóra

Sykurmöndlur – brenndar möndlur

Published 4 desember, 2012 by fanney

Jólunum fylgja sykurmöndlur eða brenndar möndlur. Það er bara svoleiðis. Sérstaklega hérna í Skandinavíu! Mér finnst þó þessar sem maður kaupir í búðinni ekkert spes, alltof harðar og of sætar og of eitthvað… bestu sykurmöndlur sem ég hef fengið fékk ég hjá strákunum á 1862 Nordic Bistro núna í september. Þessar komast ansi nærri, en þó ekki alveg. Það eru greinilega aðeins meiri töfrar settir í möndlurnar þeirra 🙂

Sykurmöndlur

Uppskriftin er ansi auðveld og hentar á eina bökunarplötu. Mjög auðvelt er að margfalda uppskriftina, en þá þarf þeim mun fleiri bökunarplötur því möndlurnar þurfa að fá pínu pláss til að sóla sig í ofninum.

___

Sykurmöndlur – brenndar möndlur

 

sykurmöndlur

500 gr möndlur með hýði

130 gr sykur

70 gr hlynsíróp

(má einnig nota samtals 200 gr sykur ef þið viljið sleppa hlynsírópinu)

2 tsk kanill

1/4 tsk svartur pipar

1/2 tsk salt

1 eggjahvíta

___

Byrjið á því að þeyta eggjahvítuna þar til hún verður að froðu. Þá er möndlunum blandað útí eggjahvítuna og þær baðaðar í froðunni. Þegar allar möndlurnar hafa fengið froðubað er sykri (og sírópi) og kryddum blandað saman við og allt saman hrært vel saman með skeið. Sett á bökunarpappírsklædda ofnskúffu (fínt að spreyja smá non-stick spreyi á pappírinn svo þær festist alveg örugglega ekki) og sett inní 130°C heitan ofn. Möndlurnar sóla sig í klukkutíma í ofninum, en á ca 15-20 mínútna fresti er ofnskúffan tekin út og möndlunum snúið svo þær bakist allan hringinn.

Voilá! Auðvelt alla leið – verði ykkur að góðu!

Fljótlagaðar bananamúffur

Published 29 nóvember, 2012 by fanney

Múffur – möffins – smábrauð – hvað sem þið viljið kalla þetta…. Þegar maður á 2-3 banana sem eru orðnir sorglega tanaðir, og maður er ekki týpan sem borðar slíka banana ,,beint af kúnni“ – þá er þessi uppskrift brilljant. Ótrúlega fjótleg og maður á yfirleitt allt í hana inní eldhússkápunum. Ætli það taki ekki ca 5 mínútur að græja deigið og svo bakar maður dúllurnar í 20-25 mínútur. Sumsé – nýlagaðar múffur á hálftíma. Selt? Prófið að henda í þetta á næsta frídegi ykkar. Hérna í Kalvåg snæddum við Camilla vinkona þessar múffur nýbakaðar og heitar, súkkulaðið bráðið inní þeim og kryddlyktin af þeim dáleiddi okkur (svolítið ýkt? Venjist því!). Pössuðu fullkomlega með kaffinu sem var bragðbætt með piparkökusírópinu sem ég gerði í gærkvöldi.

___

Bananamúffur

Fljótlagaðar bananamúffur

12-14 hefðbundin múffuform

110 gr smjör, brætt (plís ekki nota smjörlíki, það er bragðvont OG vont fyrir kroppinn)

2 egg

2-3 vel þroskaðir bananar, stappaðir

vanilluextract

230 gr hveiti

100 gr sykur

1 tsk lyftiduft

1/4 tsk matarsódi

1/4 tsk salt (ef þið notuðuð ósaltað smjör)

1,5 tsk kanill

1 tsk kardimomma (ef þið viljið, eigið og fílið kardimommu!)

100 gr saxaðar valhnetur/pekanhnetur já eða bara súkkulaði

___

Byrjið á því að kynda ofninn upp í 175°C svo hann verði tilbúinn í fjörið þegar deigið er tilbúið. Setjið 12 pappírsform í möffinsformbakka (ef þið notið slíkan). Næstu skref eru öll gerð í höndunum, engin hrærivél eða þeytari fær að koma nálægt múffubakstri!

Blandið saman öllum þurrefnum og sykri í einni skál, einnig hneturnar/súkkulaðið . Hrærið eggin saman í annarri skál og bætið bönununum útí og svo bræddu smjörinu og vanilluextracti. Hellið blautu efnunum útí þurrefnin og blandið varlega og alls ekki of mikið, bara þar til öll efnin í skálinni hafa fengið að kynnast aðeins og eru samlöguð. Ef við hrærum deigið mikið verða múffurnar seigar og leiðinlegar. Við viljum auðvitað hafa þær flöffí og skemmtilegar!

Skiptið deiginu milli 12 forma og bakið í 20-25 mínútur í 175°C heitum ofni. Leyfið aðeins að rjúka úr þeim eftir að þær koma úr ofninum, helst þó ekki meira en 5 mínútur (!!!) áður en þið snæðið þær með ískaldri mjólk, ilmandi kaffi eða nýlöguðum tebolla. Einfalt!