Eftir bleikjusamræður við vin minn í dag (já, samræður okkar geta verið furðulegar. Í vikunni ræddum við m.a. um lyftiduft) fékk ég gríðarlegt ,,craving” í bleikju. Ég átti reyndar unaðslega afganga af kínóasalati með kjúlla og grænmeti (sem ég át með tómatdressingunni himnesku) en ákvað að eiga það til góða í hádeginu næstu daga og skellti mér í Hrísalund. Þar veiddi ég þetta gullfallega bleikjuflak á tæpar 600 krónur, nóg fyrir okkur systurnar. Þegar heim var komið skellti ég í sætkartöflufrönskum, kryddaði með sterkri pítsaolíu og smá tamarísósu og inní ofn. Tekur ekki nema 15-20 mínútur þegar maður sker þær frekar þunnt, nice!

Næst græjaði ég mangósalsa með kóríander. Ég notaði eiginlega bara það sem ég fann í ísskápnum; pínu rauðlauk, fínt saxaðan; smá rauða papriku, fínt saxaða; örlítinn gúrkubita, fínt saxaðan og mangó (sem einu sinni var frosið, en ég geymi pokann inní ísskáp því þetta er notað svo mikið hérna heima) sem ég skar niður í minni bita. Svo saxaði ég slatta kóríander, ca tvær matskeiðar, og demdi yfir þetta ásamt smá ólífuolíu, salti og pipar. Tilbúið!

Bleikjan var auðveld… ég keypti fyrir nokkru einstaklega girnileg krydd í Hagkaup. Meðal þeirra er Curry Mango krydd, sem fékk að kyssa bleikjuna áður en hún fór í ljós í heilsugrillinu mínu í 3 mínútur. Þá var allt tilbúið!

Þetta var svo borðað með dass af sýrðum rjóma og kóríander rifið yfir – enda ööölska ég kóríander.

Myndin er í boði Photobooth… tæknin, krakkar, tæknin.

___

Appelsínu- og mangósalsa

f. 2 (sem meðlæti með súpu)

1 appelsína (eða blóðappelsína)

1/2 poki frosið mangó, afþýtt (eða 1/2 ferskt)

1/2 rauð paprika

handfylli ferskt kóríander

sjávarsalt

___

Appelsínan er afhýdd og sem mest af hvíta berkinum skorið af. Mér þykir best að skera fyrst toppinn og botninn af og renna svo hnífnum frá toppi og niður og taka þannig allan börkinn af. Hún er svo skorin í litla bita. Mangóið og paprikan einnig skorin í litla bita og kóríander saxað fínt. Öllu blandað saman í skál og smakkað til með örlitlu salti (eða ekki, þar er salt í súpunni ef þið notið þetta með henni).

Súpan er vissulega dálítið sérstök þar sem hún er köld, en ég er hrifin af köldum súpum og þessi rann ansi ljúflega niður. Mér leið eins og ég væri að borða einhvern gríðarlega djúsí eftirrétt. Með súpunni er borin fram appelsínu- og mangósalsa og tamarímöndlur, algjört afbragð. Ég sé alveg fyrir mér að græja þessa í einhverju hádeginu í sumarfríinu mínu, enda verður svo hlýtt og gott sumar

Uppskriftin í bókinni er gefin upp fyrir fjóra, en þar sem við erum bara tvær í heimili gerði ég einungis hálfa uppskrift. Hér fyrir neðan er sú uppskrift, eilítið öðruvísi en upphaflega uppskriftin. Uppskriftina að appelsínu- og mangósalsa má svo finna hér. Biðst afsökunar á slakri mynd, þessi er úr síma lilsys.

___

Lárperusúpa

f. 2

1/2 gúrka, gróft rifin

2 lítil avókadó

4-5 dl vatn/kókosvatn (byrjið á 4 og bætið svo við ef þið viljið hafa súpuna þynnri)

1/2 poki frosnir mangóbitar (afþýddir), af því ég átti ekki ferskt mangó

1 msk fínt saxaður rauðlaukur

1 sellerístöngull, niðurskorinn

3 msk sítrónusafi

1/2 tsk kóríanderduft

1/2 tsk cumminduft (broddkúmen)

1 tsk appelsínubörkur, rifinn

handfylli ferskt kóríander

smá sjávarsalt

___

Eins og ég sagði, þá er þetta sérstaklega einföld súpa; skellið öllu í matvinnsluvél/blandara eða potið töfrasprotanum á þetta og voilá! Súpan er tilbúin! Smakkið til með salti og sítrónusafa.

___

Sætkartöflufranskar

Sætar kartöflur (hæfilegt að nota eina og hálfa stóra sé verið að metta 4 munna)

ólífuolía

sjávarsalt

krydd að vild (rosalega gott að nota bæði timjan og rósmarín, einnig kanil og chilli)

___

Kartöflurnar afhýddar, skornar í tæplega 1 cm þykkar sneiðar og sneiðarnar síðan skornar í tæplega 1 cm þykka stubba. Ég hendi svo öllum stubbunum í poka, drissa yfir smá ólíuolíu og því kryddi sem hentar hverju sinni, hristi og nudda og dansa kónga og hendi svo á bökunarplötu. Jafna svo úr stubbunum, þeir verða helst að vera í einu lagi, þ.e. ekki troðast yfir aðra stubba, og hendi svo inní 220°C heitan ofn í 20-30 mín. Auðveldara verður það ekki!

___

Tómatmauk frá Happ

ca 4 dl.

4 dl tómatar, saxaðir (ferskir)

1,5 dl sólþurrkaðir tómatar, saxaðir

1/4 dl fersk piparrót, fínt rifin

1 lítill skallottulaukur, saxaður (notaði ca 2 msk af fínt söxuðum rauðlauk)

1 msk ólífuolía

1/2 msk sítrónusafi

1 tsk þurrkaðar chilliflögur

1/2 tsk sjávarsalt

__

Allt sett í skál/dollu og maukað með töfrasprota – eða sett í matvinnsluvél og maukað þar. Skv. bókinni á að mauka þetta gróft, en ég maukaði þetta frekar fínt sem mér þótti gott. Auðveldara gerist það ekki, folks!

Fyrir jólin var ég algjörlega gagntekin af bókinni sem veitingastaðurinn Happ var að gefa út sem heitir því stórsniðuga nafni Happ Happ Húrra. Ég fletti henni fram og til baka og langaði að prófa allar uppskriftirnar. Núna eftir jólin ákvað ég að kaupa bókina og byrja strax að prófa uppskriftir upp úr henni. Þar sem við systur erum báðar mjög hrifnar af allskyns baunaréttum þá varð þessi svartbaunaborgari fyrir valinu núna á föstudagskvöldið, borinn fram með bestu frönskum sem hægt er að fá: sætkartöflufrönskum. Við sáum hvorugar eftir því að skipta út heimabakaðri pítsu fyrir borgarann, hann var ÆÐI! Ég mæli algjörlega með því að þið kaupið ykkur bókina ef þið eruð hrifin af matnum á Happ; hollum og mjög bragðgóðum mat sem auðvelt er að græja heima í eldhúsi.

___

Svartbaunaborgari

4 buff – nóg fyrir fjóra með meðlæti og frönskum

1 dós niðursoðnar svartar baunir (ég nota þessar lífrænu úr Nettó, í svörtum dósum)

1,5 dl fersk brauðmylsna af grófu brauði (ég notaði bara afganginn af snittubrauði frá því deginum áður, ristaði og mixaði í matvinnsluvélinni)

1 dl fínt saxaður laukur (ég notaði rauðlauk)

1 dl tómatmauk (sjá hér)

1 tsk cummin (broddkúmen, ég notaði alveg 1 msk þar sem við eeelskum þetta krydd)

2 msk fínsaxað kóríander

___

Stillið ofninn á 200°C (ef þið gerið sætkartöflufranskar með, þá eruð þið búin að vera elda þær í ca korter áður en þið hendið borgurunum inn svo ofninn ætti að vera orðinn heitur þá ). Hellið vökvanum af baununum (ég skola þær líka í sigti) og setjið í skál, maukið með gaffli. Mér finnst ekki gott að mauka þær alveg í klessu, heldur vil ég hafa mauk og ,,brotnar” baunir á víð og dreif. Bætið svo afgangnum af hráefnunum saman við og hrærið. Ég leyfði þessu að bíða í ca tíu mínútur til að leyfa þessu að ,,taka sig” en þess þarf ekki. Skiptið deiginu í fernt, mótið borgara (ég hafði mína dálítið aflanga þar sem ég setti þá á lítil naan-brauð) og setjið borgarana á bökunarpappírsklædda plötu og bakið í 15 mín.

Borgarinn er ofsalega góður og djúsí, ekki þurr og bragðlaus eins og stundum vill verða. Hann er jafnframt einfaldur, fá innihaldsefni og fljótgerður. Meðlætið er svo undir ykkur komið. Á föstudagskvöldið vorum við með lítil naan-brauð sem við hituðum í ofni, smurðum með unaðslegri Happ-tómatdressingu (sjá hér), þá borgarinn, ferskar mozzarella sneiðar, kál, tómatar, avókadó og sýrður rjómi. ALGJÖR UNAÐUR! Borðuðum með sætkartöflufrönskum (sjá hér) og allir mallar glaðir. Sem sunnudagsbröns hitaði ég heilhveititortillu í öbba, smurði með tómatdressingu, setti hálft buff þar inní (tortillan er svo lítil), klettasalat, papriku, tómata og sýrðan rjóma og vá – alls ekki síðra. Býst við að sú útgáfa verið oftar gerð hér á bæ.

Helgina fyrir jól var ég svo með matarboð ásamt eiginmanni vinkonu minnar. Matarboðið var að sjálfsögðu skipulagt frá a til ö af okkur og gestirnir fengu lítið að vita í fyrstu. Eftir tveggja mánaða bið var svo komið að kvöldinu og þessi elska fékk að setja punktinn yfir aldeilis myndarlegt i, sem kvöldið sjálf var. Það er skemmst frá því að segja að allir elskuðu Fridu Kahlúa, enda annað ekki hægt! Í Gestgjafanum stendur ,,Seiðandi heit og dulmögnuð” og var ég lengi vel ekki viss hvort átt væri við tertuna eða höfund hennar, téða Ernu. Nú er ég amk viss um að þetta á svo sannarlega við tertuna, en Ernu þekki ég ekki svo ég get ekki tekið allan vafa af þar. Tertan er ekki of sæt og ekki of exótísk (þrátt fyrir chilli!), ekki of hörð og ekki of mjúk, ekki of mikið súkkulaði og ekki of væmin.. hún bara ER. Og ekkert bara, hún er með stökka marengsbotna og flauelismjúka frómasa sem harmónera virkilega vel saman. Chilli-og pekanhnetukrókantinn kemur svo með skemmtilegt tvist á þetta, án þess þó að vera of yfirgnæfandi. Ég reyndar breytti uppskriftinni aðeins (söpplæææs!), tók út apríkósumarmelaði sem átti að fara ofan á fyrri marengsinn, breytti apríkósufrómasinum í ástríðuávaxtafrómas (passion fruit) og gerði kökuna í venjulega stærð af smelluformi (ca 26 cm) í stað 20 cm smelluforms. Allt þetta eru breytingar sem ég er viss um að hafi gert tertuna mun betri fyrir mína bragðlauka (er ekkert alltof hrifin af apríkósum).

En gott fólk… eru ekki allir sitjandi? Þetta er ruuuusaleg uppskrift! Ég vona að ég verði ekki kærð fyrir að dreifa uppskriftinni, en eins og áður sagði þá er þetta ekki mín hugsmíði, heldur verð ég bara að leyfa fleirum að njóta þessarar elsku. Uppskriftin hérna er ekki alveg eins og hún kemur fyrir í blaðinu, ég útskýri mínar breytingar og set þetta í þá röð sem mér þykir þægilegt að vinna. Og folks, ekki láta langan hráefnislista og mikla lesningu hræða ykkur, þetta er í alvörunni EKKERT mál. Tekur bara aðeins lengri tíma en að skella í eina Betty, en ég lofa ykkur því að þeim tíma er vel varið og útkoman verður ólýsanleg. Vinkona mín sagði að það að borða þessa tertu væri eins og ef maður skæri rassinn af engli og borðaði hann, himneskt! Það er hægt að gera marengsbotnana með góðum fyrirvara, sem og krókantinn. Hitt er svo bara hálftími eða sirka svo. Í alvöru, ekkert mál!

Takk Erna, Fanney Dóra ♥ Frida Kahlúa-tertan.

___

Frida Kahlúa-terta með chilli-krókant

f. 8-10 (en maður grætur ALLS ekki að eiga afganga til næsta dags.. og næsta.. og næsta…)

Marengsbotnar:

2 eggjahvítur

1 dl sykur

50 gr hakkaðar möndlur

___

Hitið ofninn í 110°C. Teiknið tvo hringi eftir 20 cm smelluformi á bökunarpappír, snúið honum við og hafið tilbúinn á bökunarplötum (Ég teiknaði vissulega 20 cm hringi og hafði marengsinn í þeirri stærð, sem var bara virkilega smart þó svo að ég væri með stærra smelluform fyrir frómasinn. Þegar ég geri þessa tertu aftur, sem verður núna um helgina, mun ég gera botnana í kringum 20 cm í þvermál). Stífþeytið eggjahvítur og sykur saman (alveg í korter) og skiptið blöndunni í tvennt og blandið möndlunum saman við helminginn. (Ég tók sirka helminginn og dembdi honum á annan bökunarpappírinn, gott að tilla honum á bökunarplötunni með því að setja smá doppur af marengs (tsk eða svo) undir hvert hornið og þrýsta niður. Þvínæst blandaði ég möndlunum saman við restina af marengsinum og dembdi því á hina bökunarplötuna). Bakið í 1 klst og látið kólna í ofninum (mamma kenndi mér að gott væri að baka marengsinn að kvöldi til og slökkva svo bara á ofninum eftir klukkutíma og leyfa botnunum að verja nóttinni inní ofninum. Morguninn eftir eru þeir gullfallega þurrir og tilbúnir!). Þessa botna má geyma í einhverja mánuði, en möndlurnar gætu þránað. Það er þó ekkert því til fyrirstöðu að gera botnana með nokkurra daga fyrirvara.

___

Chilli-krókant:

80 gr sykur

1 msk rautt chilli, fínt saxað

40 gr saxaðar pekanhnetur

___

Byrjið á því að saxa chilli virkilega smátt og grófsaxa pekanhneturnar, haldið til hliðar. Bræðið þvínæst sykurinn á pönnu og bætið chilli og hnetum útí þegar hann er bráðinn. Hellið blöndunni á bökunarpappír, dreifið aðeins úr og látið kólna. Þegar þetta er kalt er þetta mulið niður og geymist ágætlega.

___

Þegar hér er komið við sögu er farið að setja kökuna saman. Það er lítið mál elskurnar, galdurinn liggur í matarlíminu og loftinu í rjómanum og eggjablöndunni!

___

Kahlúa-frómas:

4 matarlímsblöð

1 egg

1 eggjarauða

1 dl sykur

1 dl Kahlúa-líkjör

2,5 dl rjómi, stífþeyttur

___

Byrjið á því að leggja matarlímið í bleyti í kalt vatn (setjið bara kalt vatn í djúpan disk og leggið matarlímsblöðin þar ofan í, eitt af öðru. Þau mega snertast og skarast, en mér þykir betra að setja þau eitt í einu og krossa þau (sikksakk), þannig festast þau síður saman). Þeytið þvínæst rjómann og geymið í skál. Stífþeytið egg, eggjarauðu og sykurinn saman (þar til liturinn verður fölgulur og mikið loft er komið í blönduna). Setjið ca 3-4 msk af Kahlúa í pott og hitið, ekki sjóða. Blandið matarlímsblöðunum útí pottinn, eitt í einu og pískið vel á milli svo blöðin leysist alveg upp (þetta er mikilvægt, ekki viljum við matarlímstyggjóklessur í frómasíunni okkar!). Blandið svo restinni af líkjörnum saman við og hellið útí eggjahræruna. Blandið svo eggjahrærunni varlega saman við þeytta rjómann (mér finnst best að blanda hrærunni smátt og smátt útí rjómann, og blanda varlega með sleif. Ekki hræra kröftuglega, við viljum halda loftinu í bæði rjómanum og eggjablöndunni, svo frómasinn verði léttur og flauelismjúkur). Voilá! Þarna erum við komin með frómas, ekki erfiðara en svo! Þetta má nota eitt og sér sem eftirrétt, setja í litlar skálar eða eina stóra, og bera fram með þeyttum rjóma og súkkulaðihúðuðum kaffibaunum eða hvaðeina!

Höldum þó áfram með Fridu Kahlúa-tertuna… Takið smelluformið ykkar (muniði, ég notaði ca 26 cm), smyrjið og setjið bökunarpappír í botninn sem er aðeins minni en formið sjálft. Byrjið á því að setja marengsbotninn með möndlunum í botninn á forminu. Erna smurði sinn botn með 3 msk af Dalford-apríkósmarmelaði, en ég sleppti því. Þvínæst er chilli-krókantinn mulinn yfir botninn (ég notaði bara 2/3 af honum, setti restina ofan á sem skraut). Núna hellið þið Kahlúa-frómasinum varlega yfir, reynið að passa að krókantinn færist ekki allur á einn stað heldur haldist dreifður. Skellið í kæli á meðan seinni frómasinn er útbúinn.

___

Apríkósu-, chilli- og vanillufrómas (EÐA Ástríðuávaxta-, chilli- og vanillufrómas)

1 dl apríkósusafi (úr niðursuðudós) – ég notaði 1 dl ástríðuávaxtamauk sem ég fann í Hagkaup. Það væri samt tilvalið að nota sjálfan ástríðuávöxtinn, en sigta þá bara frá steinana. Þannig verður frómasinn mun bragðmeiri og ,,súrari” sem passar roooosalega við vel mýktina í kahlúa-frómasinum, sem og sterka chillibragðið.

1/2 msk rautt chilli, fínt saxað

1 vanillustöng

4 matarlímsblöð

1 egg

1 eggjarauða

2/3 dl sykur

nokkrir dropar gulur matarlitur

2,5 dl rjómi

___

Aftur – byrjið á því að þeyta rjómann og geyma. Leggja matarlímið í bleyti og stífþeyta egg, eggjarauðu og sykur. Bræðið hluta af  apríkósusafanum, eða það sem þið kjósið að nota, blandið einu matarlímsblaði í einu útí og pískið vel á milli, blandið svo restinni af safanum útí sem og chilli, fræjum úr vanillustöng og matarlitnum. Blandið matarlímsblöndunni útí eggjablönduna og lokum þeirri blöndu útí þeytta rjómann, aftur – varlega – til að halda loftinu Takið svo formið ykkar úr kælinum og hellið gula frómasinum varlega ofan á Kahlúa-frómasinn (sem nú er farinn að stífna og því verður þetta leikur einn) og kælið þar til stífnar – eða frystið! Ég setti seinni marengsbotninn strax útá á meðan frómasinn var enn í fljótandi formi, þannig festist botninn vel við og mýkist aðeins. Svo stráði ég restinni af krókantinu yfir.

Það má í rauninni skreyta þetta með hverju sem er. Ég hafði hana bara svona, en gerði pínku pons af súkkulaði-ganas (brætt súkkulaði og dass rjómi hrærður saman við) og drissaði yfir. Þegar kakan er tekin úr smelluforminu er best að setja hníf undir heitt, rennandi vatn, og fara svo meðfram öllu forminu og losa hliðarnar. Taka svo tvo spaða og ferja kökuna yfir á fallegan disk.

Þetta er kannski smá lesning hérna að ofan, en séuð þið komin hingað þá sjáið þið að þetta er í alvörunni ekkert mál. Passa bara að leysa matarlímið alveg upp og passa að hræra ekki blönduna í spað eftir að rjóminn er komin saman við. Annað er beisikk!

Gangi ykkur vel og endilega látið mig vita ef þið skellið í þessa elsku – og hvernig ykkur fannst hún smakkast! Þessi terta er tilvalin á áramótaborðið, hún er svo sannarlega glamúrös og unaðsleg!

Rétturinn er tilvalinn sem forréttur, þá bara borinn fram í fallegri skál, háu glasi eða hvaðeina, annað hvort með eða án ristaðs brauðs, baguette eða þvíumlíkt. Mér finnst ekki þurfa neitt brauð, bara ískalt og gott hvítvín og klassa félagsskap.

Finnist ykkur hugmyndin furðuleg, þ.e. að ,,elda” fiskinn í sítrónusafa án nokkurs hita, þá skora ég á ykkur að prófa! Fiskurinn er alls ekki hrár heldur verður dásamlega mjúkur og ferskur – eins og fullkomlega grillaður.

___

Bleikjuceviche

500 gr bleikja/lax/smálúða, beinhreinsuð, roðflett og skorin í litla bita
safi úr 2 sítrónum
1 msk salt
1 msk sykur

Marineruð í þessu í 24 klst (ég marineraði bara í ca 4 klst en hrærði oft og það var allt í góðu)

4 tómatar, saxaðir fínt
1 græn paprika, söxuð fínt (ég var með 1 stóra gula)
10 svartar ólífur (mmmm eða meira!)
4 msk góð olía, helst extra virgin ólífuolía
2 msk hvítvínsedik
4-5 dropar tabasco sósa (ég setti ca 1/2 – 1 tsk chilli)
1/2 tsk oregano
2 msk fersk steinselja, söxuð fínt

Fiskurinn tekinn úr marineringunni og safinn skilinn eftir. Öllu hráefni blandað í stórri skál og leyft að taka sig í 3 klst.

Ég hef lengi verið hrifin af biscotti og prófað ansi margar uppskriftir. Alltaf er eitthvað sem böggar mig, eitthvað sem er ekki eins og ég sé fyrir mér að biscotti á að vera (á klárlega eftir að prófa biscotti á Ítalíu einn daginn!). Þar til nú.

Þeir sem þekkja mig hvað best, vita af sérlegum áhuga mínum á YouTube matreiðslumyndböndum. Hvað get ég sagt? Það er eitthvað svo ægilega heillandi við það að hver sem er geti sett inn myndband af sér við að matbúa eitthvað, og alþjóð fylgist með. Þessi uppskrift er einmitt frá stórvinkonu minni Betty sem ég hef fylgst með núna í tvö ár. Betty er amerískur stærfræðikennari á eftirlaunum sem hefur yndi af því að elda og baka. Rick maðurinn hennar tekur upp þegar Betty dúllast í eldhúsinu, skipulögð sem aldrei fyrr. Henni er nefnilega mikið í mun um að allir geti gert uppskriftirnar og er því mjög skýrmælt. Alveg dásamlegt!

Þessi uppskrift að hinu ítalska biscotti er sumsé frá henni Betty, stórvinkonu minni í Ammríkunni. Klárlega besta biscotti sem ég hef smakkað! Í uppskriftinni eru notaðar möndlur og möndludropar, en það má vel sleppa þeim (eða minnka magnið) og setja þurrkaða ávexti og/eða súkkulaði í staðinn. Já eða aðrar hnetur!

___

Biscotti frá Betty

1 3/4 bolli hveiti

1/2 tsk lyftiduft

1/2 tsk salt

3 egg (þar af eitt aðskilið)

1 bolli sykur

1 tsk vanilludropar

1 msk amaretto líkjör eða 1 tsk möndludropar

2 bollar möndlur, grófsaxaðar (mér finnst möndlur með hýði langbestar, þær haldast líka betur í deiginu en þær sem búið er að afhýða)

___

Blandið sama hveiti, lyftidufti og salti og geymið. Hrærið saman með þeytara eða í hrærivél 2 egg og 1 eggjarauðu (geymið hvítuna til að penslunar síðar) og sykurinn þar til létt og ljóst (verður fölgult og loftkennt). Bætið þá vanilludropunum og amarettu/möndludropunum útí. Blandið svo möndlunum og þurrefnunum útí en passið að hræra ekki of mikið. Deigið á að vera frekar þykkt og klístrað.

Skiptið deiginu í tvennt og mótið tvo aflanga hleifa á bökunarpappírsklæddri ofnplötu. Penslið með eggjahvítunni og drissið smá strásykri yfir. Bakað í 160°C heitum ofni í 20-25 mínútur, eða þar til hleifarnir hafa tekið á sig smá lit. Kælið í hálftíma og skáskerið svo í 2ja cm þykkar sneiðar. Raðið sneiðunum á plötu (ég raða þeim alltaf þannig að þær ,,standi” en ekki ,,liggi” því þá þurrkast þær jafnt – held ég!) og bakið við 100 °C hita í 25 til 30 mín, eða þar til sneiðarnar eru orðnar þurrar og harðar.  Þetta geymist afar vel. Til skreytinga má drissa bráðnu súkkulaði yfir, ef vill

___

Myndbandið hennar Betty má finna hér.

Ég nota amerísk bollamál, 1 bolli er 2,4 dl.

Jólahnetur

2,5 bollar hnetur (það er t.d. til góð hnetublanda í Nettó, er í stórum plastdunki. Einnig er Kostur með frábært úrval af hnetum á mjög góðu verði, um að gera að gera sína eigin blöndu! Mæli með möndlum, pekanhnetum og kasjúhnetum)

1,5 msk púðursykur

2 msk smjör, brætt

1 msk ferskt rósmarín, fínt saxað (eða 1 tsk þurrkað rósmarín, mulið í mortéli eða milli fingra)

Nýmalaður svartur pipar

1 tsk salt (nema hneturnar hafi verið saltaðar, þá sleppa þessu)

1/4 tsk cayenne pipar (ég notaði chilliduft)

1/2 tsk cummin (ég notaði garam masala, og alveg heila tsk af því)

___

Aðferð:

Ofninn hitaður í 180 °C. Hneturnar settar á bökunarplötu (þarf ekki að vera pappír, en það auðveldar þrifin) og ristaðar í ofninum í ca 15 mínútur. Á meðan er kryddblandan útbúin. Bræðið smjörið og blandið öllu saman í stórri skál, sem rúmar allar hneturnar og rúmlega það. Þegar hneturnar hafa slappað af í hitanum í korter er þeim dembt útí skálina (já, meðan þær eru enn heitar) og öllu blandað vel saman í nokkrar mínútur. Ég dreifði svo úr þeim á sömu bökunarplötu og leyfði þeim að kólna áður en ég sturtaði þeim í krukku.

Rosalega góðar bjórhnetur eða sem nasl, eflaust hreinn unaður í salöt líka! Verði ykkur að góðu