Mangó- og kókoskjúlli

Þennan rétt sá ég (eins og margt annað!) á matarblogginu hennar Beggu. Ég elska þennan rétt! Er farin að skúbba bara því sem ég á í réttinn, enda grunnurinn afskaplega góður. Svona gerði ég hann síðastliðið laugardagskvöld þegar ég fékk nokkrar fallegar konur til mín í mat og drykk. Þetta var snætt með íslensku bankabyggi með kóríander og ristuðum kókos.

___

f. 4-5

4 kjúklingabringur, skornar í munnbita

2 dósir saxaðir niðursoðnir tómatar

1 dós kókosmjólk

1-2 msk jalapenos, saxað (1 msk gerir nokkuð kröftugan rétt)

1,5 laukur, saxaður

3-6 hvítlauksrif (eða 1 stór kínverskur hvítlaukur), fínsaxaður

þumalputtastykki af engifer, fínsaxað

1 msk kóríander, þurrkað

1 msk cummin, þurrkað

chilli eftir smekk

ferskt kóríander

1 mangó í bitum

___

Byrja á því að steikja kjúklingabringurnar þar til tilbúnar (ég hafði reyndar nægan tíma svo ég leyfði þeim að malla í sósunni og eldast þannig). Steikja lauk, hvítlauk og engifer í olíu í stórum potti, bæta öllu öðru saman við, nema fersku kóríander og mangó, og leyfa að malla í 15 mín. Rétt áður en rétturinn er borinn fram er kóríander og mangó skellt útí. Rosalega gott með bankabyggi eða hýðishrísgrjónum, án efa þess virði að taka tíma í að sjóða það í stað ógeðisbraðglausu hvítu grjónin… Rista svo kókosmjöl eða kókosflögur þar til þær fá á sig smá lit og hver og einn stráir svo kókos yfir sinn disk að vild! Mmmmm.. nammigott!

TTK-réttur

Gerði guðdómlegan TTK-rétt í kvöld. TTK as in tekið til í kæli. Sjá:

Innihélt:

Rauðlaukur, chilli, paprika, vorlaukur og sveppir steiktir á pönnu í smá olíu. Bæta við cummin, svörtum pipar eða því kryddi sem manni dettur í hug.  Afgangs sætri kartöflu bætt útá og hvítlauk. Grænmetinu skúbbað til hliðar og tvö egg hrærð á hinum helmingi pönnunar þar til steikt. Eitt kjúllabrjóst átti ég í frysti og ég skellti því í heilsugrillið þar til dönn. Skar niður og útá pönnuna ásamt smá soja og smá sykri og bankabyggi síðan í partýinu á laugardaginn. Kóríander saxað niður og bætt útí ásamt slettu af sweet chilli sósu. Át þetta með papadums með tómat-döðluchutney og sódastrím. Næs!

Celebrity Collage by MyHeritage

MyHeritage: Celebrity Collage – Free genealogy – Free genealogy websites

Tómatsalsa – sterk

Þessa sölsu (má maður ekki beyja úgglensk orð?) má borða með hverju sem er. Með grænmetisbuffi, kjúkling, fiski, inní samlokur, með mexíkönskum mat eða nachos. Mjög auðveld en afbragsgóð.

__

f. 2

1 box heilsukonfekttómatar

1/2 kínverskur hvítlaukur

2 stönglar kóríander

5 cm bútur vorlaukur

1 tsk lime safi

salt og pipar

___

Raspa hvítlaukinn í skál. Fínsaxa kóríander og vorlauk og bæta útí. Skera tómatana í litla bita og bæta útí ásamt lime-safa og salti og pipar. Þar sem hvítlaukurinn er hrár verður salsan frekar sterk, en það má líka sleppa honum eða minnka magnið. Svo má leika sér með þetta; bæta við rauðlauk, avókadó, mangó, steinselju…. möguleikarnir eru ótæmandi

Létt og góð sósa

Þessa sósu bar ég fram með svartbaunabuffinu mínu, en hún er góð með hvaða buffi sem er. Já eða kjúklingi eða fiski. Eða hverju sem er í rauninni!

___

1/2 dós sýrður rjómi (fituinnihald fer e. smekk, en ég mæli með Mjólku)

sambærilegt magn af grískri jógúrt

3 tsk mangó chutney (bara maukið, ekki mangóbitar)

6 cm bútur vorlaukur, fínt saxaður

smá kóríander, fínt saxað

salt og pipar

1 tsk cummin

1/2 tsk sítrónusafi

__

Öllu hrært vel saman og sósan er tilbúin! Sósan verður betri ef hún fær að standa í amk hálftíma áður en hún er borin fram.

Dásamlegir svartbaunaborgarar

Þetta var hálfgert drullumall í skál, en heppnaðist undursamlega vel að mati okkar sambýlinganna. Það er því ekki annað til ráða en að reyna muna hvað fór ofan í skálina svo endurtaka megi leikinn. Og talandi um leikinn, leikurinn í dag (Ísland-Noregur) var fáránlega spennandi! Beit í neglurnar og reif í hár mitt eins og sönn boltabulla! Dásemd

___

Svartbaunaborgarar

f. 2-4

1 dós svartar baunir (notið endilega lífrænt ræktaðar, fást m.a. í heilsuhorninu í Nettó)

1 lítill laukur

1/2 kínverskur hvítlaukur

2 cm bútur engifer

1 rautt chilli, með eða án fræja

2 gulrætur

8-10 stönglar kóríander

1 msk cummin

1 msk kóríander

1/2 pk taco krydd

salt

1/2 lítil dós maísbaunir

4-5 msk hveitikím eða brauðrasp

___

Byrjið á því að setja lauk og gulrætur í matvinnsluvél (eða rífa niður) og raspa hvítlaukinn og engifer útí. Fínsaxa chilli og setja líka útí ásamt kóríander. Mixa þar til vel saxað. Bæta þá útí baunum og mixa smá, skrapa niður úr hliðunum og bæta kryddi og mixa þar til vel samlagað. Mér finnst betra að hafa þetta ekki algjört barnamauk. Setja maukið í skál og bæta maísbaunum saman við og heitikími/brauðraspi þar til maukið verður þykkt og vel hægt að móta úr því borgara.

Skipta maukinu í fernt og móta kúlur, fletja þær aðeins niður svo úr verði fallegur borgari og steikja á báðum hliðum þar til brúnt og stökkt. Ef borgararnir eru þykkir er betra að skutla þeim inní ofn í ca korter. Þessa borgara má setja í brauð með grænmeti og einhverri sósu að vild og dugar þá uppskriftin að öllum líkindum fyrir fjóra. Við stöllur borðuðum þetta eins og buff í kvöld, tvö á mann með sósu, salati og tómatsalsa. Dásemd!

Steiktar eggjanúðlur

Fékk gríðarlega löngun í kjúklinganúðlur í vikunni. Vissi af einmana kjúllabrjósti í kistunni svo ég kippti henni upp og losaði hana þar með úr þessar ísköldu prísund sem hún hafði fengið að dúsa í alltof lengi. Eftirfarandi uppskrift er vonandi svipuð og það sem ég mallaði úr brjóstinu góða. Ljómandi fínn hversdagsmatur – og ódýr sem ekki er verra!

___

f. 2

1,5 plata af eggjanúðlum (eða 2 pk instant núðlur eða sambærilegt magn af öðrum núlum)

1 kjúklingabrjóst

1/2 laukur

1/2 kínverskur hvítlaukur (eða 2-3 rif)

mirin (má sleppa)

sojasósa

maíssterkja (gamla góða Maizena mjölið)

5 cm bútur blaðlaukur (eða 3-4 vorlaukar)

1 gulrót

smá hvítkál

sweet chilli sósa

1 egg

__

Byrjið á því að setja núðlurnar í pott sem fullur er af sjóðandi vatni. Sjóðið þar til nánast tilbúnar. Þá eru þær skolaðar uppúr köldu vatni til að stoppa eldunina og settar í sigti svo allt vatn renni af. Á meðan núðlurnar sjóða er kjúllabrjóstið skorið í litla bita og sett í skál ásamt 1 msk soja, 1 msk maíssterkju og 1 tsk mirin. Geymt á meðan önnur hráefni eru undirbúin. Grænmetið er skorið niður í strimla (julienne); ég nota svona græju á gulrótina (fæst í Pottar og prik) en það má vissulega gera þetta allt í höndunum. Hvítkálið fínsaxað í strimla og laukurinn líka. Hvítlaukurinn fínsaxaður og eggið sett í litla skál eða bolla og hrært smá saman. Blað/vorlaukurinn saxaður fínt. Þá eru öll hráefnin tilbúin til eldunar (það er mikilvægt í stir-fry eldamennsku að öll hráefni séu tilbúin því ekki gefst tími til að skera eða dúlla sér þegar steikingin er hafin).

Wok-panna (eða venjuleg panna) er hituð upp og þegar hún er orðin heit er 3 msk olíu hellt útá. Kjúklingurinn steiktur ásamt marineringunni og hrært í á meðan. Næst fer allt grænmetið nema blað/vorlaukurinn og hvítlaukurinn útá og það steikt í 2 mín. Þá er ca 3 msk soja og 3 msk sweet chilli sett út á pönnuna og hrært vel. Þegar núðlurnar eru tilbúnar (þe. skolaðar og vatns-lausar!) er kjúklingagrænmetishrærunni smellt smá til hliðar svo pláss myndist á pönnunni og þar sett eitt egg. Passið að hræra eggið ekki saman við grænmetið meðan það er hrátt, það endar í hörmungum (trúið mér!). Búið til eggjahræru (scrambled egg) þarna á pönnunni og þegar það er tilbúið bætið þið blaðlauknum við og hrærið öllu vel saman. Þá er núðlunum skellt á pönnuna og þær steiktar þar til heitar í gegn. Vesgú!

Matgæðingur

Fyrir þá sem ekki hafa séð, þá var ég Matgæðingur á Miðjunni í síðustu viku.

Ný uppgötvun…

Var svo svöng í gær en gat ekki fengið mig til þess að borða brauð, núðlur eða eitthvað sem maður er fljótur að græja. Átti túnfiskdós sem ég skutlaði í skál (þ.e. innihaldinu úr dósinni, dósin sjálf er óæt) og bætti þar útí 3-4 msk létt-Abmjólk, 1 msk Heinz chilli sósu, hvítlauk, rauðlauk, salti og pipar og át með bestu lyst

Skyrterta

Klassísk skyrterta vs. skyrtertan sem ég gerði í gærkvöldi. Upprunalegu uppskriftina fékk ég frá kærri samstarfskonu á Búsetudeild, Kristínu Tómasdóttur.

___

1 pk Lu kanilkex (ég notaði ca 25 piparkökur sem ég átti í dalli, líka hægt að nota súkkulaðikex, haustkex, blanda smá makkarónukökum saman við (mammslan mín gerir það stundum og það er sko NAMM!) eða hvaða kex sem er)

50-70 gr smjör, brætt

1 peli rjómi

1 stór dós KEA vanilluskyr (ekki einu sinni hugsa um að nota annað skyr, þetta er svo langtum besta skyrið á markaðnum!)

Frosin hindber (ég sleppti þeim, en sett í staðinn súkkulaði og karamellusósu)

Hindberjasulta (ég sleppti henni í þetta skiptið)

___

Kexið er mulið niður í fína mylsnu. Ég set það yfirleitt í plastpoka, lem það duglega með kökukeflinu og rúlla svo nokkrum sinnum yfir mylsnuna í pokanum til að fá hana fína. Sumir vilja þó ekki hafa fína mylsnu heldur smá bita með, og það er bara af því góða! Smjörið er brætt, ég mæli það svosem aldrei heldur sirka bara út hversu mikið smjör ég þarf til að bleyta sæmilega upp í mylsnunni. Mylsnunni er hellt í eldfast fat eða eitthvað fat sem þið viljið bera skyrtertuna fram í, og smjörin hellt þar útá. Hrært vel og búinn til botn með því að þjappa þessu jafn niður í botninn. Kælt á meðan fyllingin er útbúin. Þeyta rjómann og blanda svo skyrinu varlega saman við svo ekki falli niður loftið í rjómanum. Í upprunalegu uppskriftinni var hindberjasultu smurt á botninn áður en fyllingin er sett þar ofan á, og má þá nota hverskyns sultutau eða sósur, en ég sleppti því. Svo smyr maður fyllingunni ofan á botninn og jafnar út – nú eða býr til hóla og hæðir! Ofan á það eru svo sett hindber í uppskriftinni hennar Kristínar, en ég saxaði niður smá 70% súkkulaði og dreifði yfir. Átti svo pínu afgang af heitri karamellusósu sem ég hitaði upp og drissaði yfir. Þetta var mjög gott og alveg furðulega létt